Sûni muro yina Tuda-ã budi gibi di hanayindã turo. Tuda-ã ginna ŋgo yaaba hunda-ã du sûne yidoo. Borru tohoo du îyi yodoki, taa sûni-ĩ îyi hi šêgido yohi. Sûniĩ yibedi huna Tuda-ã budi muguna. Aši ñêe du yibeyindi. Ñêmmi čîtoo, aši sûnii-ĩ di yodurki to čindoo : Aši budi harčindú, lulê ni budi yihitú, sûni tohiyê ŋadi yodirki.

To di bu gobur yigesi, lulê hunã ginna yusuki, su ôze čuuŋgi, odu taa komši buyindi. Komši buyundunnoo îyi hunã čûsčinú. Komši buyundoo digisa murta tuzoo kora hûmbi yudoku ni činaku yusopi. To di bu îyi yudoku ni kalakalayindo ni hiyindi saa mundu to koo yohodi. To di bu êskidi îyi čadîe yudoki.

Sûnaa mura du šiša. Sûni guru ni bui čî guru ni kînni čî. Yoo sûni kinni-ĩ ni dîhini hunã ginna toburroo čer hunã sunugu čindi.

Tuda-ã nû mannu anna guru sûne yaaba hundã du yidao, bugi-ĩ ginna anna Čad yê Niyer yê du numaga kahrabai yidadunnáã du čîkã. Yoo Lîbiya du anna-ã sûni-ĩ nû kunu kunu du wayindudo, anna turo turonna borsu yidao, kahrabai čîĩ yiŋgal du anna-ã îyi tallayaa čadi, toi di sûni-ĩ hi wayuo. Čîidi anna êriskiyindîe kaya hundã ha guyindu tigandi.

Šûni yunu budi gali ni budi ambado.

Tudo yê sûni yê zaga nedindîe yugó.