Mêdi a yagabi WhatsAppa Êmi Kusu daga Tudaa-ã čoŋudo.
Sodura Gaddaya Abdugadur mi yê Šuha Kurdi mi yê mêdi dahu ndodurii-ĩ hi su nukundi. 

Aũ aribiyinã : Mahûma Gûtran

Dahu ndoduri čindoo aũ guru dahu hunã yunu guru čubabã šurči-ĩ togurkoo, anna guru kôi togurkudĩ yugopu yodurkoo. Taa amma kayini. Yunu to hi yuhati. 

Yunu a muro yina budi abagada Tuda-ã yohudã turo : Anna didi kara-ã tûrrudu yugonnó di daha yihitu ni anna kayindi dîna-ã kôi gudi čido yugó. 

Dahu-ã yodurki tohoo, anna aũ weši-ĩ, môora, aũ hundã guyindu ni kôi aũ daha yihidĩ čî tukudi. Taa, aũ daha yihidĩ yina hunã čabčini. Yina hunã mura :
-    bôbori yê;
-    asuna bôboree kalastuda gûrbe yê;
-    asuna duwala wûni-ĩ du zotia yê;
-    gobur nusu yê;
-    mbi yê;
-    dîhini hidimili nêe yidi-ĩ hi tududo yê. To lôko mbi bûyinîe tohoo du sabčunu ni bûyuni.

Dahu ndoduri-ĩ gunna tûguhu yodurki. Doguhu zaga čurîe yugó čindi. Lôko yôdurkîe tohoo nê gui yugopi, zogo amma ha tulli duyindîe yiŋgaldu. Taa dahu-ã yodurki di gubudi amma ha hiyindi : Aũ dahu hunã yogurã wuna čindi. Taa wetiga ha arbiyindi. Hakuma taa kubo činai. 

Odu to di bu dahu-ã yodurki. Amma ha yîdišidu ni anna hunã turčundi. Aũ yerčinîe tammayinîe koo orko busau duyindu ni sa hunã ha su činaki. Taa, aũ daha yihidĩ bôbori-ĩ yida dahu-ã kôi ŋgori-ĩ čîĩ yigannu aši-ĩ hi turhohi ŋadi yugobi. Taa, aša-ã tuzoo gunna kidekinu ni ka hundã ha lûle yihudu ni su duusa čûuŋi. Taa, anna čûu tigirdu ni dusaa-ã di kasčundu yidadu čendi. Odu taa, aũ daha yihidĩ kômma yî yigezi. Guro sumsumči yugurîe koo, gobur nusu-ã su zuzurčini. Kôi guro tîtikunoo asanu duwalu mbo wûni du yidĩ yugurtu ni ŋui koi-ĩ hi su činai, taa guri-ĩ tuzi. 

Taa, asunu bubur-ã yida ni surči-ĩ yugobi. Surči dahuu-ã muro ôhure ôguzuu du ginnadu ôronnu cîĩ budi ordi, tôi di kidikidiyunu yugobi. Taa, surči kôikoidu cîĩ muro kunu čučusu naani yesku, budi wor gunú. Tôi di kurnoki yogobi. Surči gunna du wô čîĩ surči čuu ordi naani êrereu tohi ni kurnoki yugobi. Muro alli-ĩ kurru hunã ha su ndaktu cîĩ yiŋgaldu lôko yugôbîe tohoo budi yayi yidai. Taa, surči-ĩ kidekini. Kômma du dîhini hidimili nêe yidĩ hi tududĩ du mbi bûyini. To di bu daaša-ã ka hokunu ni tuyuni. 

Taa amma ha tulli duyini. Tugôhu yê dûnogu yê du dugusa ôguzuu kora to koo yohi. Tôrou layini yidai, aša-ã ka hundã čenu kôi šurči-ĩ yodurã du turrú, ŋui-ĩ ka tigiri kora-ã. 

Aũ adam guyini ni weši gunnoó kôi ôwuri tohi kora-ã kayini. Yoo, kôi ôwure čûu yee ôguzuu tohi hi, ŋui hunã ko njorčini. 

Dahu ndoduri-ĩ muro yunu budi abagadi cindi. Anna didi kara-ã tûrrudu yugonnó di šurči dahua-ã yodurku ni amma kayîni.

Yuhatîe koo, Tû du anna tuzoo daha yihitia čîki. Anna ôguzuu-ã čatta, turo-ã ni či. 

Muro Tuda-ã yina budi dunada yuhudã turo.